تعرفى على طريقة عمل كيكة الشاتو المحشيه 

مقدمة من الشيف مروة امارة

المكونات :

 كوب زبده على زيت او زيت بس

كوب لبن

كوب سكر

كوب و نص دقيق منخول

نص كوب كاكاو خام

٣ بيضات

نص باكيت بيكنج بودر

فانيليا

الطريقه :

هنضرب الزيت و السكر و اللبن و الكاكاو في الخلاط لحد ما الصوص يتقل و بعدين ناخد كوبايه من الخليط نركنها على جمب و نسيب الباقي في الخلاط و نضيف عليه البيض و الفانيليا و نكمل ضرب . هنجيب بوله نحط فيها الدقيق و البيكنج بودر و ننزل عليها الخليط السائل و نقلب بمعلقه لحد ما الدقيق يختفي.

هنجيب صنيه مقاس ٢٢ أو ٢٤ مدهونه بالسمنه و ننزل فيها خليط الكيك .

التسويه :

هندخل الكيك فرن سخن على درجة حراره ١٨٠ لمدة نص ساعه و نختبرها لو استوت نخرجها من الفرن و نسيبها تبرد و بعدين نطلعها من الصنيه .

هنجيب سكينه و نفرغ الكيك من النص من غير ما نوصل للأرضيه .

هنسقي الكيك بنص كوب كاكاو محلى و نحضر الحشوه.

مكونات موس الشوكولاته :

كوب موس شوكولاته بودر

كوب لبن

معلقتين نوتيلا ( اختياري )

طريقة الموس :

هنضرب الموس مع اللبن بالمضرب حوالي خمس دقايق لحد ما يتقل و بعدين نضيف النوتيلا و الكيك اللي فرغناه و نكمل ضرب لحد ما المكونات كلها تتجانس و بعدين نحشي الكيك بخليط الموس و الكيك و ندخلها التلاجه و نحضر الكريمه .

مكونات الكريمه البيضا :

نص كوب كريمه شانتيه خام

ربع كوب سكر بودره

نص كوب لبن 

طريقة الكريمه :

هنضرب المكونات من ٥ ل ٧ دقايق لحد ما الكريمه تتقل  و نغلف الكيك بالكريمه و ندخلها التلاجه ساعه و بعدين نخرجها نصب عليها صوص الشوكولاته اللي شيلناه في الأول و نزين بالشوكولاته البيضا و المكسرات و بالهنا 

 







يمكنك مشاركة الخبر علي صفحات التواصل