ماتشات تمثيل.. مش مسلسلات

** اتعودت انام والتليفزيون شغال.. ومن يومين قبل عيني ماتروح في النوم سمعت صوتاً مميزاً أعرفه يتغزل في مصر بشكل خلاني أقوم من النوم عشان أشوف جورج قرداحي المذيع المحبوب قاعد قدام بسمة وهبة بيقول قصايد شعر وغزل في مصر ويشرح الوضع بعد مؤامرة 2011 وبعد ثورة 30 يونيه ويدعو لقائدها وشعبها وجيشها وشرطتها بالتوفيق والسداد.. وعلي قد مافرحت بما يقوله المذيع "اللبناني" اللامع علي مستوي العالم كله علي قد ماحزنت لأن فيه شوية مغيبيبن بيقولوا إنهم من مصر لسه بيهرتلوا وبيحاولوا يحبطوا الناس مع إن الحكاية والصورة والرواية بقت باينة زي الشمس .. الشعب واقف ورا رئيسه وجيشه وشرطته عشان البلد تمشي لقدام.. وأتحدي أي مذيع مصري يعرف يقول ربع اللي قرداحي قاله من قلبه.. وأهم حاجة من قلبه.. بجد شيء يزعل إن اللي من بره يحب بلدنا أكتر من ناس عايشة فيها وبتاكل من خيرها.. ربنا يهدي العاصي.. قولوا آمين. 

** فرق السما من الأرض بين إعلانات شركات المحمول الأربعة.. تلاتة آخر شياكة في الكلمات والألحان والشخصيات الراقية عمرو دياب وضيوفه ونانسي عجرم وتامر حسني وماجد الكدواني وكريم عبد العزيز.. لكن الرابعة كلمات مسفة وممثل فاشل وبلطجة وفرد عضلات والسلام وبسبب البلطجي ناس كتير رمت خطوطها في البلاعة عشان ماتفتكرش الإعلان..!! 

** أحمدآدم.. فنان محترم من يوم ماعرفته.. قال إن ممثل اسمه محمد رمضان بيدور علي الشهرة والناس تتكلم عنه وخلاص .. يإخوانا ده مريض نفسي بداء المحروم لما يشبع..!! 

** الحمدلله.. ثبت بالدليل القاطع إن فرقة فنكوش مسرح مصر في البدنجان.. رأي الناس فيهم بيقول كفاية الملايين اللي عملوها بالغلط في سنة واحدة ويقعدوا في بيوتهم..!! 

** واحدة قالتلي "هوه صادق الصباح بيغسل أموال قلت "ليه".. قالت أصل اللي يعمل مسلسلين تافهين ورا بعض لممثل فاشل اسمه علي ربيع يبقي إما بيغسل أموال أو بيرمي فلوسه في الهوا قلت" لابيغسل فلوسه ولابيرميها في الهوا عشان بيبيع لفضائية وفلوسه بترجع".. واللي بيشتغلوا معاه موافقين إن ربيع يبقي البطل بتاعهم عشان الفلوس.. قرصة الجوع وحشة بعيد عنكم..!! 

** مصطفي خاطر.. قلتلك ياضنايا لسه بدري عليك تشيل بطولة حلقة واحدة مش مسلسل.. بتقتل نفسك بإيديك.. لكن الفلوس لذيذة..!! 

** "القاهرة والناس" أحسن فضائية في رمضان.. عندهم كل حاجة.. موجز أنباء "فرخة"طارق نور أحسن كوميديا هادفة.. "شيخ الحارة" أحسن برنامج ومذيعة بسمة وهبة.. ومسلسل"حكاية 
مرة" لأحسن ممثلة غادة عبدالرازق..!! 

** الناس اللي غاوية تتهزأ وتتمسخر وتاخد فلوس.. تستاهلوا اللي بيتعمل فيكم مع رامز جلال وهاني رمزي .. محدش ضربكم علي إيديكم ترفضوا إذاعة الحلقة .. ده إذا ماكنتوش متفقين..!! 

** معظم موضوعات المسلسلات الرمضانية "شرابات مقلوبة".. لكن فيه مباريات تمثيل بين أحمد السقا ومحمد عادل إمام وكريم محمود عبدالعزيز وهيثم أحمد زكي ومحمدرجب ومصطفي شعبان ودياب وأميركرارة ومحمد ممدوح ومحمد شاهين وفتحي عبد الوهاب وحمادة هلال ومحسن منصور وغادة عبدالرازق وآيتن عامر وصابرين ومي عز الدين وبوسي وريهام عبدالغفور ودينا الشربيني ومي عمر وعزة مجاهد.. وكل الممثلين في"زلزال" ماعدا محمد رمضان بيمثل لوحده .. وفي"فكرة بمليون جنيه" كل الممثلين ماعدا علي ربيع بيمثل علي نفسه.. ولسه لما نشوف أكتر هانقول كمان..!! 

** وجود هادي الجيار ورياض الخولي وجمال عبد الناصر وأحمدعبدالعزيز وكمال أبورية في المسلسلات يقول التمثيل لسه بخير..!! 

** بذمتكم.. حد حاسس إن فيه ماسبيرو.. القناة الأولي فاضيه وفارغة.. الثانية سمك لبن وخروب .. الفضائية"ماسكة نفسها بالعافية".. الإقليميات بتغزل برجل حمار.. نايل دراما برنامج وبس.. نايل سبورت ماتشات الدوري.. الله يرحم الإعلام والريادة والتفرد.. والقيادات اللي بجد!! 

** تظل وفاء عامر أطيب ممثلة في مصر.. لسه قلبها أبيض .. ربنا يخليلك حمادة وعمر..!! 

** إيمان السيد.. عمرك ماهاتبقي كوميدية.. الكاريزما وخفة الدم من عند ربنا..!! 

** الأهلي بيحرق دم الجميع.. جمهوره اللي بيستني لآخر دقيقة.. والمنافس اللي مش قده ولا قادر عليه..!!