الشعب.. سيد قراره

** عارفين يعني إيه مصر تتولي رئاسة الاتحاد الأفريقي.. يعني القارة السمراء رجعت لأحضان أم الدنيا.. وإن مصر الحمد لله استعادت مكانتها الطبيعية.. ومع إننا عندنا الكثير من الهموم والأحمال بما يكفي جوه وبره لكن وطنية وقوة وحزم الرئيس السيسي تحسم الأمور دائماً لصالح مصر بما يمنح الدول الأفريقية الثقة والاقتناع بأن مصر ممكن تمرض قليلاً لكنها لا تموت ولا تفقد تاريخها واسمها لأن الله سبحانه وتعالي حباها ووهبها شعباً عبقرياً يتناسل عباقرة يتوارثونها ويحافظون عليها ويتحملون عشان خاطرها ما لا يتحمله بشر غيرهم كما يمنحها الله دائماً قائداً يعرف قدرها ماعدا "الإستبن" الإرهابي اللي قعد سنة علي قلبنا وغار في ستين داهية هو وعشيرته لتستكمل مصر وشعبها الحياة مع رجل مخلص وعاشق لترابها.. أهلاً أفريقيا وأهلاً بالعقل المصري القائد إلي الخير والبناء لمدة سنة قادمة وأهلاً بكل الايجابيات والأمنيات الحلوة لمصر وشعبها.. وأهلاً للاحباط والغيظ وحرقة الدم لكل اللي يكرهنا..وتحيا مصر للأبد. 
** كتبت هنا عدة مقالات طالبت فيها بتعديل الدستور لأسباب كثيرة أهمها أننا وافقنا عليه وقت صدوره عشان المركب تمشي وييجي رئيس جمهورية يسوقها لبر الأمان بعدما الأمواج كانت بتاخدها في خمسين حتة.. وكمان عشان اتسلق علي إيد ناس بعضهم لاأثق في نيته نهائياً.. والحمدلله إني ماكنتش عاوز ده لوحدي لأن فئات كتير بتطلب التعديل خاصة اللي حتي مايعرفوش يعني إيه دستور لكنهم حاسين إنه مكتف البلد من إيديها ورجليها وكمان بعد ماشافوا الدنيا ماشية رغم مايتحملونه من قرارات اقتصادية تصب في مصلحة البلد والشعب.. وجاء البرلمان ليعبر عن نبض ورغبة الشعب ويتقدم أكثر من العدد المطلوب من النواب بطلب لتعديل المواد المقيدة لحركة الدولة أو التي لاتعطي فئات معينة حقوقهم مثل المرأة والشباب وذوي القدرات الخاصة بالإضافة للصحة والتعليم .. وطبعاً لقينا المرضي النفسيين والمغيبين والمأجورين وبتوع التلات ورقات بدأوا حملات ضد التعديلات وإحنا متوقعين ده طبعاً لأن ده تمامهم من أيام الله يجحمها مؤامرة يناير..ولكن الناس خلاااااااااص فضحوهم وطقوا وقرفوا منهم. 
وللشعب العبقري ذاكروا "المادة 226" من الدستور هاتعرفوا إن الشعب هو سيد قراره الحقيقي .. وبتقول: لرئيس الجمهورية. أو لخىمس أعضاء مجلس النواب "20%" . طلب تعديل مادة. أو أكثر من مواد الدستور. ويجب أن يُذكر في الطلب المواد المطلوب تعديلها. وأسباب التعديل. وفي جميع الأحوال. يناقش مجلس النواب طلب التعديل خلال ثلاثين يوماً من تاريخ تسلمه. ويصدر المجلس قراره بقبول طلب التعديل كليًا. أو جزئيًا بأغلبية أعضائه. وإذا رُفض الطلب لا يجوز إعادة طلب تعديل المواد ذاتها قبل حلول دور الانعقاد التالي. وإذا وافق المجلس علي طلب التعديل. يناقش نصوص المواد المطلوب تعديلها بعد ستين يوماً من تاريخ الموافقة. فإذا وافق علي التعديل ثلثا عدد أعضاء المجلس. عرض علي الشعب لاستفتائه عليه خلال ثلاثين يوماً من تاريخ صدور هذه الموافقة. ويكون التعديل نافذاً من تاريخ إعلان النتيجة. وموافقة أغلبية عدد الأصوات الصحيحة للمشاركين في الاستفتاء. وفي جميع الأحوال. لا يجوز تعديل النصوص المتعلقة بإعادة انتخاب رئيس الجمهورية. أو بمبادئ الحرية. أو المساواة. ما لم يكن التعديل متعلقًا بالمزيد من الضمانات.. وافتكروا إننا لسه ما سمعناش الرأي الأساسي. 
** اللواء خالد دكروري يقود قطاع الأمن بماسبيرو بطريقة جماعية رائعة ويحاول نشر هذه الروح فيما يعرض عليه من موضوعات تخص بقية القطاعات.. عشان كده كراماته ظهرت خلال خمسة شهور فقط.. برافو. 
** نائلة فاروق رئيسة التليفزيون.. بما إنك ورثتي تركة منيلة بستين نيلة مالكيش ذنب فيها إسمحيلي أخبصلك علي حاجات متعرفيش عنها حاجة عشان إنتي جدعة وبتكافحي لوحدك.. عندك "قيادة لاشينية" بتشتغل نائب رئيس قناة صحتي الخاصة "بدون إذن كتابي" وبـ 15 ألف جنيه شهرياً مع إنه لما إتعرف إن "ج.ع" و"أ. ص" بيشتغلوا فيها أخدوا جزاء من النيابة الإدارية واتخصم من المرتب "اشمعني بقي".. وتاني حاجة خللي بالك فيه سكرتير مش تبع مكتبك بيشتغل جاسوس عليكي لحساب "زوزو".. وتالت حاجة واحد قالي "خلية لاشين في القناة الأولي مش هاتسيب نايلة".. وهاقولك الباقي المرة الجاية.. ربنا يقويكي..!! 
** مش كان المفروض حسين زين يطلع يقول إجراءات بروتوكول التطوير مع إعلام المصريين.. بدال ماكل واحد بيهرتل علي مزاجه..!! 
** بيقولك إتنين حرامية اختلفا.. فظهرت السريقه واتفضحا ..!! 
** عرفت مين هو الأهلي .. الأهلي قرارات تؤدب ولاتهين ولاتجرح .. وعزيزي سيف زاهر "المحترم قوي"..الأهلاوية بيشكروك الخميس إللي فات.. كشفت كل حاجة..!! 
** سؤال للأغبياء: هي الفيديوهات "إياها" ظهرت قبل واللا بعد الإعتراض علي تعديل مواد الدستور.. الله يكسفكم..!! 
** أمير كرارة: إيه اللي عملته ده في حلقة "سهرانين" اللي فاتت.. الناس كرهتك بسبب بلطجي السيما..صالح جمهورك واعتذرلهم..!! 
** محمد إسماعيل المحترم صاحب قناة "الحدث اليوم".. الصحفية محاسن السنوسي قدمت برومو و3حلقات من برنامج "مشكلتك إيه" وفوجئت بطردها من مهندس زراعي وتاجر أدوات منزلية ومخدتش فلوسها..ينفع ترجعلها حقها قبل ماتروح للمجلس الأعلي للإعلام..أنا واثق فيك..!! 
**بحبك..يا(.........).. مين..!!!