نظرة

 مرض "المهرجانات"

بقلم .... عمرو حافظ

الجمعة 21 فبراير 2020
عمرو حافظ

سمعت صوت عالى ورغم أننى مرهق و عايز أرجع البيت أنام قلت أشوف فيه  ايه  دخلت  على المكان اللي الصوت جاى منه لقيت المغنى خلص الأغنية و الناس أتلمت عليه  تتصور معاه بسأل مين ده.. قالولى: ده أشهر مغنى مهرجانات
لقيته أمامى وجها لوجه و كأن الناس  مشيت من المكان و مفيش غيرى أنا و هو.

قلت له : الناس بتقول أنك أشهر واحد فى أغانى المهرجانات اليومين دول و صوتك مسموع فى كل مكان وحققت أعلى مشاهدات.

قال لى:  تصدق ياعمنا والله ماعرفتش طعم الراحة كله عمال يضربنى هو مفيش غيري بيغنى مهرجانات ولا يعنى الكحكه فى إيد اليتيم عجبه!

قلت له مقدرش انكر أن لك جماهير كبيرة من الشباب ،ولكن أعترض على  العبارات والجمل الغنائية التى تحمل معانى غير أخلاقية و تحرض على السلوك  السىء.

قال لى ممكن توضح وتترجم كلامك  ؟!
قلت له :انت مش شايف أن أغانى "المهرجانات"   بترفع  و تعلي من اللي يحمل السلاح و يستخدم القوة و العنف فى كل  تصرفات حياته و جعلت تعاطى المخدارت و شرب الخمور من صفات الرجوله .. ياعم دى أغانى المهرجانات عدت كل الخطوط الحمراء و جعلت من العلاقات النسائية المشبوهه  المرفوضة فى المجتمع  شىء من الفخر و التباهى مش واخد بالك أن كل ده ممكن ياخد  جيل  كامل من الشباب فى بحر غريق ضلمة 

قطع علي كلامي،و قال لى :  أنت عايز تفهمنى أنى أغانى المهرجانات بس هى اللى  عملت كل ده  ليه ماتكلمتش عن المسلسلات  و الأفلام اللى كلها عنف و إثاره و إغراء  و خلت  أحسن حل لآى مشكلة هو القوة والانحراف وبقى البلطجى هو البطل و أبو الجدعنه كلها  اللي بتجرى وراه  الستات و البنات و بيكسب الملايين باللعب على كل الحبال ،لو بتتكلم بالحق و العدل  هتلاقى أن مش أغانى المهرجانات لوحدها  اللى زقت الشباب فى البحر الغريق الضلمة 

قلت له: ماخبيش عليك   أن الفن الأيام دى  متصاب بمرض و فيروس ولافيروس كورونا  و اتأخرنا  و رجعنا فى حاجات كثير شوف السينما و المسلسلات  و الأغانى بعد ما كنا إحنا على قمة الهرم  فى العالم العربى    دلوقتى  فيه الإنتاج اللبنانى ومن قبله السورى والأعمال الهندية المدبلجة و غيرها  أخدت مننا مشاهدين كثير  مش من الجمهور العربى بس، لأ و المصرى كمان فيه كثير بيتابعها ويستنى موعيدها

قال لى :انت شايف الحل إيه ؟ 
قلت له: و الله يا عمنا ابدأ بنفسك .
 سألنى طب أعمل أيه ؟
 قلت: أعتزل  غناء المهرجانات ده غناء بيضرب  زى "الشاكوش "ويكسر فى  الناس و الفن  احسن حاجة تغنى نوع تانى.. بص ليه و برق بعينه و ثبت فى مكانه و متحركش و رجع خطوتين وأغمى عليه.
 و فجأة قمت من النوم  على صوت عالى بسأل فيه إيه قالولى :   دى أغانى  مهرجانات أصلى عندنا حفلة خطوبة فى العمارة .. قلت: لاحول و لاقوة إلا بالله ..مهرجانات و أنا نايم و أنا صاحى كمان مهرجانات فى كل مكان
 

عداد مباشر ... كورونا

المصابون

الوفيات

المتعافون

كورونا ... عدد الوفيات والإصابات حول العالم